កំពង់ស្ពឺ៖ ប្រជាពលរដ្ឋសហគមន៍រងគ្រោះដីធ្លីប្រមាណាជាង៥០០នាក់ កាលពីថ្ងៃទី០៧ ខែមីនា ឆ្នាំ២០២២ បានរួមគ្នាប្រារព្ធ ទិវាសិទ្ធិនារីអន្តរជាតិ ៨មីនា ឆ្នាំ២០២២ ខួបលើកទី១១១ ក្រោមប្រធានបទ «ស្ត្រីដើម្បីកិច្ចគាំពារសង្គម និងសិទ្ធិដីធ្លី»។
ក្នុងកម្មវិធីខាងលើ ត្រូវបានអញ្ជើញចូលរួម ពីតំណាងក្រុមប្រឹក្សាសហគមន៍អមលាំង តំណាង មន្ត្រីប៉ុស្តិ៍រដ្ឋបាល មេភូមិ ក្រុមប្រឹក្សាស្រុក និង តំណាងអង្គការ លីកាដូ រួមទាំង អាដហុក ព្រមទាំងសមាគមសម្ព័ន្ធសហគមន៍កសិករកម្ពុជា (CCFC) ផងដែរ។
ការរៀបចំប្រារព្ធពិធី ទិវាសិទ្ធិនារី អន្តរជាតិ ៨មីនា ខួបលើកទី១១១របស់ប្រជាសហមន៍រងគ្រោះដីធ្លី ចំនួន៣សហគមន៍រួមមាន៖ សហគមន៍ អមលាំង សហគមន៍រស្មីសាមគ្គី និងសហគមន៍ត្រពាំងជោ ស្ថិតនៅស្រុកថ្ពោង ខេត្តកកំពង់ស្ពឺ ធ្វើឡើង ក្នុងគោលបំណង
១. ដើម្បីចូលរួមរំលឹកខួប១១១នៃការទទួលស្គាល់ជាសកលសិទ្ទិនារីអន្តរជាតិ ក៏ដូចជាផ្សព្វផ្សាយអំពីច្បាប់បទដ្ឋានគតិយុទ្ធជាតិ អន្តរជាតិក្នុងការបង្កើនការយល់ដឹងអំពីការលើកកម្ពស់សិទ្ធិនារី។
២. បញ្ឍប់ការរើសអើងគ្រប់ទម្រង់មកលើស្ត្រីនៅសហគមន៍មូលដ្ឋាន និងផ្តល់សេវ៉ាទាមទាអោយអាជ្ញាធររដ្ឋដាក់បញ្ចូលកសិករ ជាពិសេសស្ត្រីអោយទទួលបានសេវ៉ាកិច្ចគាំពារសង្គម និងដំណោះស្រាយដីធ្លីយុត្តិធម៌។
៣. ដើម្បីផ្សព្វផ្សាយជាសាធារណៈ អោយបានទូលំទូលាយទៅលើក្របខ័ណ្ឌគោលនយោបាយជាតិ ពីកម្មវិធីកិច្ចគាំពារសង្គម ដែលកំពុងដំណើរការអនុវត្តន៍បច្ចុប្បន្ន។
គួររំលឹកផងដែរថា ប្រជាពលរដ្ឋខ្មែរភាគច្រើន បានពឹងផ្អែកលើដីធ្លី ដើម្បីបង្ករបង្កើនផលទ្រទ្រង់ជីវភាពរបស់ពួកគេ ដែលក្នុងនោះ៧៩% រស់នៅជនបទ។ ហេតុដ្នេះហើយទើបធ្វើអោយពួកគេពឹងផ្អែកស្ទើរទាំងស្រុងទៅលើការកាន់កាប់ និងអាស្រ័យផលដីធ្លី និងធនធានធម្មជាតិផ្សេងទៀត។ យ៉ាងណា ការរីករាលដាលនៃអំពើពុករលួយ បានធ្វើឱ្យមានការរំលោភដីធ្លី ដែលបង្កផលប៉ះពាល់ដល់ការប្រើប្រាស់សិទ្ធិលើកម្មសិទ្ធដីធ្លី និងឯកសារពាក់ព័ន្ធ ទៅនឹងកម្មសិទ្ធទាំងនោះ ដោយប្រជាពលរដ្ឋភាគច្រើនមិនទាន់មានប័ណ្ណកម្មសិទ្ធដីធ្លីត្រឹមត្រូវ។ កត្តានេះហើយបានធ្វើឱ្យពួកគេក្លាយជាជនងាយរងគ្រោះ ពីការរំលោភដីធ្លី៕
