ជំនួបរវាងរដ្ឋមន្រ្តីក្រសួងដែនដី និងឧត្តមក្រុមប្រឹក្សាពិគ្រោះ និងផ្តល់យោបល់ ឈានដល់ចំណុចនៃក្តីសង្ឃឹមក្នុងនយោបាយដីធ្លីជូនប្រជាជនកម្ពុជា

ភ្នំពេញ៖ នាវិមានសន្តិភាព នៃទីស្តីការគណៈរដ្ឋមន្រ្តី កាលពីថ្ងៃទី០៧ ខែតុលា ឆ្នាំ២០២៥ បានបើកកិច្ចប្រជុំមួយ រវាង ឧត្តមក្រុមប្រឹក្សាពិគ្រោះ និងផ្តល់យោបល់ ជាមួយក្រសួងរៀបចំដែនដីនគរូបនីយកម្ម និងសំណង់ ដឹកនាំដោយ ឯកឧត្តម ឧបនាយករដ្ឋមន្រ្តី រដ្ឋមន្រ្តី សាយ សំអាល់។

ក្នុងជំនួបនោះ ឯកឧត្តម ឧបនាយករដ្ឋមន្រ្តី រដ្ឋមន្រ្តី សាយ សំអាល់ បានជជែក និងបង្ហាញពីដំណើរការ នៃក្រសួងដែនដីនគរូបនីយកម្ម និងសំណង់ ដែលបាននិងកំពុងអនុវត្តនូវសមរភូមិទៅតាមផែនទីឯកភាពការងាររបស់ខ្លួន ដើម្បីបន្តមរតកសុខសន្តិភាពក្នុងក្របខណ្ឌក្រសួង និងធ្វើឱ្យមរតកនេះ ចាក់គ្រឹះក្នុងសង្គមកម្ពុជា ការពារកុំឱ្យការបែកបាក់វិលត្រលប់មកវិញសម្រាប់ប្រជាជនតជំនាន់។

ជាមួយគ្នានេះ ឯកឧត្តម ឧបនាយករដ្ឋមន្រ្តី ក៏បានបង្ហាញផងដែរថា ក្រោយឈានទៅបញ្ចប់ការបង្កើតបរិយាកាសមិនមានវិវាទ ក្រសួងរៀបចំដែនដីនគររូបនីយកម្ម និងសំណង់ បានងាកមកការងាររៀបចំដែនដី និងនគរូបនីយកម្ម ដោយកសាងទីប្រជុំជន និងលំហសាធារណៈឱ្យមានជីវិត និងធ្វើឱ្យប្រជាជនកម្ពុជាមានជីវភាពកាន់តែប្រសើរ និងចូលរួមចំណែកកសាងខឿនសេដ្ឋកិច្ចកម្ពុជា ដើម្បីកម្ពុជាជាប្រទេសមានភាពរឹងមាំ រស់បានដោយខ្លួនឯង និងឯករាជ្យម្ចាស់ការ។

ក្រោយបានស្តាប់ការលើកឡើងរបស់ ឯកឧត្តម ឧបនាយករដ្ឋមន្ត្រី រដ្ឋមន្រ្តី ក្រសួងរៀបចំដែនដី នគរូបនីយកម្ម និងសំណង់ ឯកឧត្តម អ៊ុន ជឹម ប្រធានប្រតិភូ នៃឧត្តមក្រុមប្រឹក្សាពិគ្រោះ និងផ្តល់យោបល់ និងជាប្រធាគណបក្សឯកភាពជាតិខ្មែរ ក៏បានចូលរួមផ្តល់យោបល់ ជាមួយក្រសួងរៀបចំដែនដី នគរូបនីយកម្ម និងសំណង់ ព្រមទាំងបានស្នើ ឯកឧត្តមរដ្ឋមន្រ្តី ចំនួន៣ចំណុចធំៗ រួមមាន៖

១ ស្នើសុំចែកដីជូនប្រជាពលរដ្ឋដែលគ្មានដីឱ្យបានគ្រប់គ្នា

២ ស្នើសុំដកដីសម្បទានពីក្រុមហ៊ុន ដែលមិនមានការអភិវឌ្ឍន៍ និងពិនិត្យមើលដីសម្បទានក្រុមហ៊ុន ៥ទៅ១០ឆ្នាំក្រោយមក ក្លាយជាដីឯកជន តាមរយៈការធ្វើអនុប្រយោគ។

គូរជម្រាបជូនថា ជាមួយគ្នានោះ ឯកឧត្តមអ៊ុន ជឹម ក៏បានសម្តែងការកោតសរសើរ ចំពោះការខិតខំប្រឹងប្រែងរបស់ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តី ក្រសួងរៀបចំដែនដី នគរូបនីយកម្ម និងសំណង ព្រមទាំងសហការី ដែលបានខិតខំប្រឹងប្រែងក្នុងការវាស់វែងដីធ្លីជាប្រព័ន្ធជូនប្រជាពលរដ្ឋទូទាំងប្រទេស៕