ចេញផ្សាយ ថ្ងៃព្រហស្បតិ៍ ទី២៧ ខែកុម្ភៈ ២០២០
ភ្នំពេញ៖ នារីជាបុគ្គលិកធនាគារ MB Bankម្នាក់ជិះម៉ូតូ១គ្រឿងរអិលដួលចូលកង់អុិចស្នាវ៉ាទ័របែកក្បាលស្លាប់ភ្លាៗនៅកន្លែងកើតហេតុ អ្នកបើកបរបង្កត្រូវបានឃាត់ខ្លួនភ្លាមៗ។
ហេតុការណ៏គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង៧និង៣០នាទីព្រឹក ថ្ងៃទី២៧ ខែកុម្ភៈ ឆ្នាំ២០២០ នៅចំណុចមុខផ្សា រងិនអាន ហៅផ្សារទំនប់ ស្ថិតតាមបណ្តោយផ្លូវលេខ៥៩៨ ភូមិពោងពាយ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
សពនារីរងគ្រោះឈ្មោះ សុិន សុនវត្តី ភេទស្រី អាយុ៣២ឆ្នាំមុខរបរបុគ្គលិកធនាគារMB Bank ស្នាក់នៅផ្លូវ៥៩៨ ភូមិពោងពាយ សង្កាត់ទួលសង្កែ២ ខណ្ឌឫស្សីកែវ ភ្នំពេញ ជិះម៉ូតូម៉ាក់ឃ្លីកពណ៌ស ពាក់ស្លាក់លេខភ្នំពេញ 1AF 6599។
អ្នកបេីកបរ អុិចស្កាវ៉ាទ័រ ឈ្មោះ ឆេង វាសនា ភេទប្រុស អាយុ២៧ឆ្នាំ មុខរបរបេីកអុិចស្កាវ៉ាទ័រ ស្នាក់នៅភូមិទូលចាន់ ឃុំសំរោង ស្រុកសំរោង ខេត្តតាកែវ បេីកអុិចស្កាវ៉ាទ័រម៉ាក់ ហីយ៉ាន់ដាយ ពណ៌លឿង ពុំមានស្លាក់លខ។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកេីតហេតុ គេឃើញម៉ូតូជនរងគ្រោះ និងអុិចស្កាវ៉ាទ័រ បានធ្វើដំណើរស្របទិសគ្នាពីជេីងទៅត្បូង លុះដល់មកចំណុចកេីតហេតុ ស្ត្រីរងគ្រោះជិះម៉ូតូខាងលេីម្នាក់ឯងឡើងចិញ្ចើមផ្លូវដោយមានទឹកសើមៗក៏រអិលដួលចូលក្រោមកង់មុខអុិចស្កាវ៉ាទ័រ កិនបណ្ដាលអោយបែកក្បាលស្លាប់ភ្លាមៗតែម្ដងនៅកន្លែងកើតហេតុ។
ក្រោយពេលកេីតហេតុ សមត្ថកិច្ចមូលដ្ឋានបានទៅដល់និងទាក់ទងទៅជំនាញផ្នែកចរាចរណ៍ ចុះមកធ្វើការវាស់វែងរួចបានយកវត្ថុតាងរថយន្តអុិចស្កាវ៉ាទ័រ និងអ្នកបើកបរនឹងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោករាជធានី ដេីម្បីចាត់ការបន្តតាមនីតិវិធីផ្លូវច្បាប់។
រីឯសពនារីរងគ្រោះសមត្ថកិច្ចជំនាញផ្នែកចរាចរណ៍ បានធ្វើកំណត់ហេតុប្រគល់សពជនរងគ្រោះជូនទៅឲ្យក្រុមគ្រួសារនឹងសាច់ញាតិយកទៅចាត់ចែងធ្វេីបុណ្យតាមប្រពៃណី៕
